Tun-an pa ni Comelec Provincial Supervisor Lionel Marco Castillano kun iya bang i-apelar ang pagbasura sa Lapulapu City Prosecutors Office sa kasong illegal possession of firearms ingon man kalapasan sa Comelec gun ban batok kang kanhi Cordova Mayor Arleigh Sitoy.
Matud ni Castillano gipaabot pa niya nga madawat ang kopya sa resolusyon sa City Prosecutors Office aron iyang katun-an kun duna ba siyay igong basehanan pag-apelar sa maong kaso.
Gipasabot ni Castillano nga mahimo niyang i-apelar ang pagkabasura sa maong kaso ngadto sa Comelec Law Department sa kaulohan.
Kini tungod kay subay sa Comelec Rules and Procedure mahimong ika-apelar ang mga kaso nga gibasura sa prosecutor’s office kun may kalambigitan sa eleksyon.
Giangkon ni Castillano nga iyang girespetohan ang desisyon sa piskaliya pagbasura sa kaso batok kang Sitoy apan nagdumili lang una pagkomentaryo si Castillano kabahin sa pamahayag ni Mayor Adelino Sitoy, amahan ni Arleigh, nga mas misamot kalig-on ang kasong kalapasan sa Anti-Graft and Corrupt Practices Act nga gipasaka niini karon sa Office of the Ombudsman- Visayas gumikan sa pagkabasura sa kaso.
Si Arleigh gipasakaan og kaso sa kapolisan ug Comelec human masakmit gikan sa Starex van sa pamilyang Sitoy ang lainlaing kalibre sa armas, salapi nga P299 mil ug campaign paraphernalias niadtong naghinangat ang piniliay sa Mayo 14.