Mahuyang gitipi sa iyang landlord nga ex-convict

Patay ang usa ka mahuyang human kini dunggaba sa  ex-convict nga tag-iya sa balay nga iyang gipuy-an dihang wala kini mohatag og kwarta kagahapon sayo sa buntag diha sa sitio Mahayahay sa Calamba.

Ang biktima nga giila lang sa angga niining “Shawie” nakaangkon og usa ka samad dinunggaban diha sa tuong lusong-lusong nga nakaingon sa hinanali niining kamatayon.

Ang suspek giilang si Larry Tabasa,30, giingong ex-convict gikan pa sa Muntinlupa base sa pamahayag ni PO3 Henry Estoy sa Homicide Section.

Sumala pang Estoy, ang biktima kasamtangang nakigtabi sa kapuyo sa suspek nga si Jennifer Pitong,30, diha sa sulod sa balay dihang kalit nga miabot ang suspek.

Gikatahong gipangayuan sa suspek og kwarta ang biktima apan wala lang kini panumbalinga ni Shawie, wala damha sa biktima nga nasuko diay kaniya ang suspek ug kalit lang mibunot og kutsilyo dayon   gihansakan ang lusong-lusong sa biktima.

Ang suspek dali usab nga milakaw human dunggaba ang biktima samtang si Shawie misuway pa og dagan pagawas sa balay aron magpatabang apan nahagba kini pipila ka metros gikan sa pultahan.

Ang biktima wala na madala sa tambalanan sanglit nabugtuan kini sa iyang kinabuhi.