Babayeng kolektor gipusil sa tulisan

Usa ka babayeng kolektor ang gitulis ug gipusil sa usa ka kanhi bilanggo sa Muntinlupa diha duol sa Cebu Provincial Detention and Rehabilitation Center sa barangay Kalunasan kagahapon sa udto.

Ang napusilan ug gidala sa tambalanan giilang si Cayetane Habilis, 44,  sa Tuyan, Naga, collector sa mineral water nga Rain Dew Purified Drinking Water.

Ang suspek kinsa daling miikyas apan nadakpan gihapon sa gihimong follow-up operation sa kapolisan giilang si Richard Vicente, 36, taga sitio Langub sa barangay Guadalupe ning dakbayan.

Matud pang SPO1 Carlos Sillacay sa Guadalupe police station sa pakighinabi sa Banat News nga nangolekta ang biktima sa mga gipautang niini diha sa maong dapit dihang naagian ang grupo sa suspek nga nanag-inom.

Gikatahong giduol ni Vicente ang biktima ug gihingian og kwarta apan giingong nagdumili ang biktima sa paghatag hinungdan sa kasuko sa suspek ug gipusil ang biktima makausa diha sa tiyan.

Si Vicente positibong giila ni Jimmy Plando, truckboy nga  kauban ni Habilis niadtong tungura kinsa gihinabi sa Banat News.

“Giatangan ang babaye nga akong kauban ninaog man siya kay ni-backing man mi, nadunggan nalang namo ang buto paglingi namo nakit-an pa nako nga gitiunan sa liog ang among kauban (Habilis) unya gikuha ang kwarta,” asoy pang Plando.

Matud pa niya daling mipalayo ang suspek diha sa dapit human makuha ang P900 nga nakolekta sa tubig.

Ang biktima dali nilang gidala sa Chung Hua Hospital tungod sa usa ka igo sa samad pinusilan sa walang bahin sa dughan ug gipailawom dayon sa operasyon.

Ang grupo nila ni Insp. Miguelito Bondoc sa Guadalupe police station nga maoy mihimo sa follow-up operation misikop kang Vicente diha sa panimalay niini nianang pagkahapon.