2 ka bata naanod; 1 patay, 1 missing

Konpirmadong namatay ang usa ka 16 anyos nga dalagita samtang padayon pang  missing ang kuwatro anyos nga bata nga naanod sa dakong baha niadtong Domingo sa hapon diha sa Guindaruhan, Minglanilla.

Ang maong dapit usa ka bukirang barangay nga  gibanabanang pito ngadto sa 10  ka kilometro ang gilay-on gikan sa Poblacion.

Ang namatay pag-abot sa Minglanilla District Hospital giila sa kapolisan nga si Miriam Heruela, tinun-an  sa Guindaruhan National School ug ikaduhang anak gikan sa kinamaguwangan sa magtiayong Dionisio ug Cecilia Heruela  sa Guindaruhan.

Matud pang PO2 Rico Emperwa sa Minglanilla Police Station nga nahinabi sa Banat News kagahapon sa hapon mitug-an nga dili tinuod ang report nga nakit-an na ang kuwatro anyos  nga si Parame.

“Dili tinuod uy! Ni contradict bitaw na sa nahaunang report nga nakit-an na kuno pero among gisusi bitaw didto  dili man tinuod as of this time padayon pa ang among gihimong search operation sa bata,”  matud pa ni PO2 Emperwa.

Ang mga  kapitan sa Guindaruhan, Tungkop ug Tulay lakip na ang  lokal nga kagamhanan sa Minglanilla maoy naglangkob sa  search and rescue team, sa pamasin nga makit-an pang buhi ang biktima.

Matud ni Emperwa segun sa iyang nahibaw-an ang kapitan sa Inuburan, Naga mitabang usab sa pagpangita ni Parame nga padayong  missing hangtod ning pagsulat.

Segun sa report niadtong Domingo pasado alas 4 sa hapon ang magtiayong Heruela lakip sa ilang tulo ka mga anak nag-picnic  ngadto sa ilang umahan  ug nag-anag og mais.

Apan sa ilang pagpamauli si  Miriam mibala sa buko-buko  niini sa iyang manghod nga si Parame sa dihang molabang na sila sa sapa kuyog ang ilang inahan nga si Cecilia  nga nagkugos usab  sa laing anak nga si Quintin.

Nag-una ang inahan sa paglabang ug nagsunod si Miriam uban ni Parame.

Apan igo lang naabot sa tunga sa sapa  si Miriam nga nagbala ni Parame, mibul-og      ang dakong baha gikan sa bukid ug naabtan gyud si Miriam kinsa niadtong higayona naulahi sa iyang inahan sa paglabang.

Nagkabuwag si Miriam ug Parame apan unang nakit-an si Miriam ug gidala kini sa  Minglanilla District Hospital apan gideklarar kining patay na nga naabot.

Daghan ang nagtuo nga patay na si Parame apan duna usay mga tawo nga nagtuo nga  buhi pa  kini.