Giinsister ni Cordova Mayor Adelino Sitoy nga legal ug walay babag ang pagkapili ni Dumanjug mayor Sarsi Baricuatro isip bag-ong Presidente sa League of Municipalities of the Philippines (LMP-Cebu Chapter) bisan pa man og absent kini sa gipahigayong eleksyon sa liga niadtong nilabay’ng adlaw.
Si Sitoy nga usa sa mga bantagong manlalaban dinhi sa Sugbu ug maoy napiling vice president for external sa liga nipadayag nga mahimong mapili sa maong posisyon ang si bisan kinsa nga mayor bisan og dili kini makatunga sa gipahigayong eleksyon.
Gipasabot ni Sitoy nga mayoriya sa mga mayor nga nitambong ang nipabor nga si Baricuatro ang mohulip sa kanhi Presidente sa liga nga si kanhi Dalaguete mayor Ronald Allan Cesante nga usa na karon ka bise mayor human napupos ang iyang tulo ka termino niadtong nilabayng eleksyon og nilansar na lang kini pagka besi mayor.
Nasayran nga wala makatambong si Baricuatro atol sa maong eleksyon human sa gipatawag nga tigum sa Provincial Development Council diha sa kapitolyo niadtong Huwebes gumikan kay atua kini karon sa gawas sa nasud.
Apan matud ni Sitoy dili ma-kwestyon ang pagkapili ni Baricuatro pagka presidente sa liga gumikan kay wala may nibarog nga moatbang ug kadtong buot untang moatbang ang maoy adunay katungod nga mokwestyon kun legal ba o dili ang pagkapili sa bag-ong mga opisyales.
Samtang napili sab nga vice president for internal si Lilo-an Mayor Duke Frasco og Secretary si Aluguinsan mayor Cynthia Moreno.
Apil sa nitambong sa Provincial Development council Meeting mao ang mga mayor nga kontra partido ni Gobernador Gwendolyn Garcia sa nilabay’ng eleksyon sama nila ni Medillen mayor Ricky Ramirez, Casiano Gerona sa Tabuelan, Daidee Zambo sa Toledo City ug Pinamungajan mayor Geraldine Yapha.