Kumboya sa mga tulisan gikonpirmar

Gikonpirmar ni Cebu City Police Office ang pamahayag nga giluwatan ni Mayor Tomas Osmeña kabahin sa impormasyong nagkumboya na ang mga pundok sa mga tulisan gikan sa nagkadaiyang dapit ingon man mga local boys nga molusad og mga pagpanulis dinhi.

Si Sr.Supt. Patrocinio Comendador mitug-an sa mga tigbalita kagahapon nga niadto pang nakalabay’ng semana nila nadawat ang susamang impormasyon.

Gikatahong nasigpatan dinhi ang mga kanhi miyembro sa grupo ni Rey Torres. Ang maong grupo gituuhan kaniadto nga na-neutralize na sa CCPO human masikop si Torres ug uban pang mga kaubanan niini.

Gawas sa grupo ni Torres, gituuhang ang grupo sa Bohol Robbery Gang ug ang grupo sa Carcar Robbery Group giingong nagkumboya na aron molusad og sunod-sunod nga pagpanulis sa bisan asang establisamento dinhi sa dakbayan ilabi na sa mga financial districts.

“Not only coming from Bohol Robbery Group duna say uban nga grupo nga sighted nato and spotted nga they are probably planning something, ang atong nakita in their presence we might construed their presence nga they are planning nefarious in Cebu City,” asoy pang Comendador.

Nunot niini nakigtagbo na ang kapolisan ngadto sa mga kadagkuan sa Cebu Bankers Club sa dakbayan aron sabutan ang mga seguridad sa ilang mga miyembrong bangko ug kung unsay angayang buhaton.

“We have identified soft targets, banks that have less security measures. We try to focus on soft targets,” dugang pang Comendador.

Usa sa mga gihimo karon sa kapolisan mao ang pagpadala og suwat ngadto sa usa ka bangkong ilang namatikdang huyang kaayo ang seguridad ug morekomendar og mga pamaagi aron mapalig-on pa ang ilang security system.

Duha na ka semana ang nakalabay, nasigpatan ang mga kanhi sakop sa grupo ni Torres dinhi sa Sugbu apan wala na sila makit-i pag-usab. Wala hinuoy nahitabong dagkong pagpanulis hangtud ning pagsulat sa balita.

Samtang duna nay koordinasyon nga gibuhat ang CCPO ngadto sa Lapulapu police station kabahin sa pagkasikop sa upat ka mga gipasanginlang tulisan nga giingong nalambigit na sa pagpanulis sa usa ka gasolinahan sa Mandaue ug ingon man ang pagtulis ug pagpatay sa magtiayong negosyante sa lungsod sa Carcar.