Engkuwentro sa Villaba nakaangin og ginang, anak

Patay ang usa ka ginang ug ang iyang anak nga 12- anyos nga batang lalaki human napagan atol sa nahitabong engkwentro tali sa rebelding NPA ug mga sakop sa militar didto sa Villaba, Leyte niadtong Lunes sa alas 10 sa gabii.

Gikonpirmar sa hepe sa 19th Infantry Battalion sa 3rd district sa Leyte Lt. Col. Louie Dagoy nga adunay namatay human napagan sa engkwentro ang ginang nga naila sa  ngalan nga Leonora Labrador, 40,  ug ang iyang 12-anyos nga anak lalaki nga si Anthony.

Samtang laing duha ka sakop sa rebelding NPA ang napatay sa maong engkwentro nga milanat og 30 minutos nga naila nga sila si Feliciano Labrador, 50, bana ni Leonora ug ang usa ka Jesrel, nagpangidaron og 40 pataas.

Gibutyag ni  Dagoy dihang  nahinabi sa Bantay Radyo nga nakadawat sila og intelligence report kabahin sa pagpahigayon og mga meeting sa mga sakop sa rebelding NPA nga gipangulohan sa usa ka Geronimo Maceda alyas kumander  Maning sa usa ka payag sa maong lugar.

Hinungdan nga gipaubos kini sa surveillance ug sa  dihang ilang nakonpirmar mipahigayon dayon og operasyon ang militar hinungdan nga niadtong Lunes sa gabii nahitabo ang engkwentro.

Matud ni Dagoy unang nagpabuto ang mga rebelde sa dihang nakabantay ang iro nga nagsige og usig samtang nagpaduol sa payag nga gimetingan niini.

Wala molahutay og dugay ang mga rebelde ug misibog kini paglabay sa 30 minutos og atol sa gipahigayon nga clearing operation didto pa nakit-i ang mga napatay nga duha ka rebelde sa gawas nga bahin nga nagbuy-od nga wala nay mga kinabuhi.

Samtang ang patay’ng lawas sa inahan ug anak didto makit-I sa sulod nga bahin sa payag nga gituohan nga napagan sa maong engkwentro.