Suroy-suroy ni Gwen giduphan sa mga mayor

Gipanalipdan sa pipila ka kanhi mayor sa kalungsuran ang programa sa turismo ni Gob. Gwendolyn Garcia nga gitawag og Suroy-Suroy Sugbu nga gipatuman atol sa ilang administrasyon.

Kini human niluwat og pamahayag si Bogo City Mayor Celestino “Junie” Martinez nga usik-usik lang sa pondo sa gobyerno ang maong programa.

Matud pa ni Bokal Wilfredo Caminero, kanhi mayor sa lungsod sa Argao, nga dunay benepisyo nga nakuha ang kalungsuran sa maong programa sa gobernador.

Hinuon giangkon ni Caminero nga nakagasto gyud ang lokal nga kagamhanan sa maong programa apan may benepisyo usab nga nakuha.

Si Caminero nipasabot nga ang Suroy-Suroy Sugbu maoy nagdiskubre sa mga tourist destinations sa usa   ka lungsod ug nakita sa mga opisyal ang mga kakuwangan niini.

Sa lungsod sa Samboan, matud pa sa kanhi mayor, Bokal Peter John Calderon, nga usa sa nasuta sa mga tinugyanan sa Department of Tourism ug mga travel operators mao ang kakuwang sa mga pansayan nga magamit sa mga lokal ug langyaw nga turista nga mobisita sa usa ka lugar.

Nunot niini, matud pa ni Calderon nga pinaagi sa maong programa, nausab na ang kakuwangan sa kalungsuran sa pagtagad sa mga turista.

Ang Suroy-Suroy Sugbu gisugdan ni Garcia niadtong tuig 2005 ug ang ikatulong hugna ilusad na usab niining buwana nga magsugod sa habagatan bahin sa lalawigan sa Sugbu.