Tulisan naputos sa bun-og

Naputos og bun-og sa kalawasan ug nawong ang usa ka gipasanginlang tulisan nga mihana og dunggab sa usa ka TV reporter nga padulong mosimba sa Sto. Niño niadtong Domingo sa hapon.

Pito ka tahi sa ulo ang naangkon sa suspek nga si Ramil Labastida Manatad, 20, taga dalan Verano, Banawa barangay Guadalupe human siya gitabangan og bukbok sa mga tawo diha sa maong dapit.

Sa imbestigasyon sa kapolisan, si Manatad maoy gitumbok nga milabni sa kuwintas ni Margie Sanchez, 36, taga barangay Lahug diha sa atubangan sa Sto. Niño.

Si Sanchez daling migukod ug nagpunay og siyagit sa pagpangayo og tabang hangtud nga miabot diha sa dapit  nga mikanaog sa PUJ  si Jonalyn Jumabes,reporter sa CCTN ug Aksyon Radyo.

Si Manatad sa sobrang karatol posibleng nagtuong gibabagan siya sa tigbalita hinungdan nga iya kining gihanaan og dunggab sa gibitbit nga kutsilyo apan pagkakita ni Jumabes sa kutsilyo dali siyang milipot sa luyo sa usa ka kotse.

“Kadtong babaye unta iyang dunggabon pero midagan man ang babaye sa akong likod maong akoy hapit nadunggaban,” asoy pang Jumabes.

Gikatahong sa sobrang karatol sa suspek hasta ang ubang mga tawo nga nagsunod-sunod iyang gipanghanaan og duslak sa kutsilyo lakip na ang duha ka traffic enforcers.

Naatlan nga dihay usa ka off-duty nga polis sa Mabolo Police Station nga si PO2 Nestor Daclison uban sa iyang asawa nga nanimba nakabantay sa komosyon ug daling miresponde.

Si Manatad misuway pa og dagan apan naabtan siya diha sa dalan Lincoln.Human makahibalo ang mga estambay nga isnatser si Manatad ila kining gikuninitan og kulata.

Nabawi ra usab gikan  sa suspek ang kutsilyo ug ang kwintas ni Sanchez.

Kasong robbery ug dili theft ang ipasaka sa kapolisan batok kang Manatad bisan iya lang gilabni ang kwintas sanglit gisuwayan niini og dunggab ang biktima.