Plano sa mga robbery groups sa Cebu gibutyag

Naabot na kang Mayor Thomas Osmeña ang taho nga naghugpong karon ang mga notadong mga tulisan ug usa sa ilang mga target mao ang mga bangko sa siyudad sa Sugbu.

Kini sama sa mga ginsakupan kaniadto sa bangiitang tulisan nga si Rey Torres, Kuratong Baleleng ug ang Bohol Robbery Group.

Apan wala hinuon kaayo mabalaka ang mayor niini tungod kay giingong wala magkuwang ang dakbayan sa pagpahimangno sa mga financial institution sa siyudad.

“We already offer the banks different possibilities, we set up the mars system, they are not receptive to it, we are not getting the desired cooperation from the banks,” sumala pa sa mayor.

Taliwala niini giangkon ni Osmeña nga siya duna gihapoy tulobagon kun unsay dangatan sa nahisgutang mga establisamento isip amahan sa dakbayan.

Ang mayor wala masurpresa nga mamahimong target ang dakbayan sa Sugbu sa mga tulisan tungod sa kadaghan sa mga financial institutions niini.

“Cebu is always a lucrative target as soon as they can set up their operations,” dugang pamahayag ni Osmeña.

Giklaro hinuon sa mayor nga sa kasamtangan, naminusan ang mga insidente sa pagpanulis sa siyudad.

Sa nasayran, labing minos upat na ka mga dagkong pagpanulis ang nahitabo dinhi sa dakbayan sukad sa buwan sa Enero.

Katapusang biktima sa maong insidente mao ang Metro Cebu Public Savings Bank sa dalan Natalio Bacalso Avenue ning siyudad.

Subay niini subling gipahimangnoan ni Osmeña ang mga financial institutions sa dakbayan nga magmabinantayon tungod kay posibleng sila maoy sunod nga biktima.

“So far we’ve been able to reduce greatly the incidents of robberies in the city but we’ll never know,” matud sa mayor.