Lupon vs Balaga nagka-init

Nagkainit na karon ang tinubagay sa barangay kapitan sa Pari-an nga si William Balaga ug sa iyang gitaktak nga mga sakop sa Lupon Tagapamayapa.

Ang bise presidente sa kanhi Lupon sa Pari-an nga si Teresita Jumao-as mikwestyon karon sa pagpabilin sa katungdanan sa ilang barangay treasurer nga si Nita Delicano.

Matud ni Jumao-as nga dili na angayang magpabilin sa posisyon si Delicano, tungod kay kini nakadispalko na og kuwarta sa barangay.

Gani sumala pa ni Jumao-as nga napriso na si Delicano niadtong miaging buwan sa Abril human ipadakop sa ila mismong kapitan.

Apan ang gikahibudngan ni Jumao-as nga ang ilang treasurer nagpabilin gihapon sa katungdanan taliwa sa kahiwian nga nahimo niini.

Dali hinuon nakapanalipod si Balaga sa ilang treasurera, tungod kay taliwala sa nahimo niini, nagpabilin gihapon ang pagsalig ug kompiyansa sa mga sakop sa ilang konseho.

Gipasalig sa Kapitan nga dili na makapanghilabot si Delicano tungod kay matag adlaw nang idiposito sa bangko ang kuwarta nga moabot sa barangay.

Gawas nga gipsaylo sa konseho ang ilang treasurera niingon si Balaga nga walay lain usab nga ikapuli niini sa katungdanan diha sa ilang barangay.

Laing pasangil ni Jumao-as mao ang pagpabilin usab sa katungdanan sa ilang barangay secretary nga si Carmen Rodriguez bisan kung kini giingong nalambigit ug kahiwian.

Matud ni Jumao-as nga si Rodriguez lakip nga gikiha sa Cebu City Comelec Office tungod sa giingong pag-tamper niini sa payroll sa Comelec.

Apan sumala pa ni Balaga nga igo lang nagkuha og information sheet sa eleksyon ang iyang sacretary ug gidala sa barangay ug walay kalabutan sa nahisgutang pasangil.

Gani niingon si Balaga nga bisan ang taga Comelec nipamatuod niini lakip na si city election officer Attorney Marchel Sarno nga inosente si Rodriguez sa pasangil.

Subay niini nipahimangno ang kapitan nga maghinay-hinay si Jumao-as ug kaubanan sa ilang mga akusasyon aron dili magproblema sa umaabot nga panahon.