Gihangop sa mga lumolupyo sa kabarangayan sa dakbayan sa Mandaue ang tinguha ni Mayor Jonas Cortes nga mga mini-firetrucks nga maoy unang makatubag sa alarma sa sunog ug makasulod sa mga hilit nga lugar.
Gipadayag niya ang maong tinguha sa dihang nahitabo ang kalit nga pag-ulbo sa kalayo sa sitio La Paz, Cambaro nga miugdaw og mokabat 30 ka balay ug gisugdan na usab unta ang uban pang sikbit nga kabalayan.
Ang mga sakop sa Accident Control and Emergency Rescue Team (Acert) maoy nakatampo sa pagpugong sa pagkaylap sa kalayo sanglit nakasulod man ang mini-fire truck niini.
Ang maong matang sa mini-firetruck nga gitawag ni Mandaue City Fire Marshall Oscar Mayol nga fire penetrator maoy iyang gisugyot kang kanhi Mayor Thadeo Ouano.
Ang gagmay nga matang sa firetruck gikinahanglan alang sa pagsulod sa hagip-ot nga mga dalan nga masunog ang kabalayan.
Kahinumdoman nga nakumbinser ni Mayol ang kanhi mayor sa dakbayan sa dihang nakasinati ang Metro Cebu og taas nga brownout dihang naputol ang power supply nga gikuha sa lalawigan sa Leyte.
Si kanhi Konsehal Glenn Bercede nga tandem nga bise mayor ni Mayor Cortes apan gipilde ni Bise Mayor Fortuna maoy nagduso sa maong resolusyon alang sa pagpalit og fire penetrator dihang miawhag usab si Mayor Ouano sa pagpalabang sa budget niini.
Alang kang Ouano nga ang mini-firetruck o fire penetrator dili lamang magamit sa panahon sa panginahanglan sa sunog kun dili magamit usab sa panahon nga kuwang og supply sa limpiyong tubig ang mga lumolupyo sa hilit nga lugar sa dakbayan.