Lapulapu plebiscite malinawon

Nagmalinawon ang gihimong plebisito sa pagka “Highly Urbanized City” sa dakbayan sa Lapulapu kagahapon nga gisugdan alas-7 sa buntag ug natapos sa alas-3 sa hapon.

Matud pa ni Lapulapu City Comelec  Officer  Atty. Ann Jeanet Lamban nga mga ala-1:00 pa kagahapon sa kaadlawon sila nga nagpulaw sa pagpanghatag og mga materyales sa tanang mga magtutudlo nga sakop sa Plebiscite Board of Canvassers sa matag presinto ug wala na silay nasinati nga problema sukwahi sa milabay'ng nga local election.

Subay niini mga alas 4:00 kagahapon sa hapon naghugpong ang mga kadagkoan sa Comelec nga gipangunahan ni Atty. Rene Buac ang Regional Director, Atty. Marco Lionel Castillano, Atty. Marchel Sarno, Atty. Edwin Cadungog nga maoy naglangkob sa Sub-Canvassers sa nagpadayong eskutinyo sa mga balota.

Atol ning pagsulat sa balita, padayon pa ang eskutinyo apan daghang mga taga Lapulapu ang nagtuong molampos gyud ang tinguhang ideklarar nga highly urbanized city ang ilang dakbayan.

Matud pa ni Atty. Lamban nga sila gihapon ni Dr. Leonilo Oliva ang DepEd Schools Division Superintendent sa Lapulapu ug Lapulapu City Prosecutor Evangeline Gecale nga naglangkob sa Board of Election Canvassers.

Dunay 733 ka mga presinto sa mainland samtang sa Isla sa Olango dunay 124 ka mga botante sa matag presinto.