Mipatay sa dentistry stude 'sikop

Nasikop kagahapon sa buntag sa Homicide Section sa Cebu City Police Office (CCPO) ang usa sa suspetsado sa pagpatay sa estudyante sa dentistry sa Southwestern University niining dakbayan.

Si Jun (ngalan gipugngan) 16-anyos taga-Banawa, Guadalupe niining dakbayan nasikop sa mga polis mga alas 7:15 sa buntag diha sa 1st Baptist Church, Private street, Sambag I niining siyudad.

Si Jun kinsa gikatahong sakop sa “Crips” fraternity duna nay kasong kalapasan sa Akta Republika 7610  kon “Child Protection Act” nga nasang-at diha sa sala ni Regional Trial Court Judge Olegario Sarmiento sa Branch 24.

Kahinumduman nga si Michael Lumbuan Dogol-Dogol graduating sa kursong dentistry sa nahisgutang unibersidad gipusil katulo ka higayon  sa buko-buko ug namatay.

Ang maong insidente nahitabo niadtong Biyernes diha sa dalan Urgello niining dakbayan human si Dogol-Dogol ug ang uyab niini maniudto.

Ang kauban sa mamumuno giilang sila si Jessie Camachu, Tisha Jane Maeirhoffer ug laing upat nila ka kauban kinsa wala pa mailhi ug lakip na niini si Jun.

Dala sa mga polis nga misikop ni Jun ang warrant of arrest nga giluwatan ni Sarmiento.

Si PO3 Teodoro Lumanas polis sa Guadalupe mibutyag kagahapon sa Banat News nga niadtong milabay'ng tuig giduso ang kasong kalapasan sa RA 7610 sa korte sa mga ginikanan sa nabiktima ni Jun.

Matud ni Lumanas nga posibleng gibunalan ni Jun ang biktima tungod kay maayo mang pagkapusa sa ilong niini. Si Jun nagtingkagol karon sa Guadalupe police detention cell.

Ang mga polis sa CCPO mipakita og litrato ngadto sa uyab ni Dogol-Dogol ug gitumbok niini si Jun maoy mipusil sa biktima.

Gibutyag usab sa uyab ni Dogol-Dogol nga ang biktima kanhi sakop sa Akrho apan miundang na kini sa maong pundok.

Giandam na ang kasong pagpatay batok sa suspek lakip na sa iyang kaubanan.

Gituohang may kalambigitan sa panagribal sa fraternity ang hinungdan sa pagpatay sanglit mismong ang biktima sa wala pa patya nakahunghong pa kini sa kahera sa kan-anan nga ilang gikan-an nga namay-ungan niya ang naniid nga sila si Maerhoffer ug Camachu ug mga kaubanan niini lakip na si Jun nga iyang mga kontra.