NPA fronts sa Visayas nangabungkag

Nangangkon ang Armed Forces of the Philippines nga nagkahinay na ang pwersa sa mga rebeldeng New People’s Army dinhi sa Central Visayas gumikan sa gipangusgang operasyon sa militar inabagan sa kapolisan.

Si AFP chief of staff, General Hermogenes Esperon Jr., sa pakighinabi sa mga sakop sa media niadtong Biyernes nangangkon nga kung itandi kaniadto mas migamay na ang NPA dinhi.

“There is a great reduction in the strength of the NPA here, we have targeted several guerilla fronts to be dismantled, two have already been dismantled for the year and we are confident that all those that targeted will be dismantled by the end of the year,” pangangkon pang Esperon.

Dako ang pagtuo ni Esperon nga mas molambo pa unya ang maong rehiyon kun hingpit nang mawala ang hulga sa insurhensya dinhi, apan karon palang duna nay maayong gibunga ang maong kalinaw ug kahapsay.

 “So I must say the threat all the more has been reduced and indeed we can consider the Centcom area and Palawan to be really areas that could have some more growth in tourism,” asoy pang Esperon.

Matud pang Esperon ang maong kalambuan naggikan sa kooperasyon sa PNP ug AFP nga maoy naghatag og kasiguruhan ngadto sa mga negosyante ilabi na sa industriya sa turismo.

Si Esperon nagkanayon base sa gibutyag ni Central Command commanding general, Cardoso Luna, misaka og 43 porsiyento ang pagsaka sa industriya sa turismo dinhi.

Niadtong milabay’ng semana, nakadawat og impormasyon ang kapolisan kabahin sa presensya sa mga gidudahang mga sakop sa NPA gikan sa Negros nga mga Ilonggo speaking.

Gikahadlukang basin dunay plano ang maong grupo sa paglusad og pagpangatake dinhi sa Sugbu pinaagi sa pagtakubang mga inspectors sa ahensya sa gobiyerno alang sa umaabot nga Annual General Inspections.