`Extended’ ang registration apan...

Gipaabot nga maghuot karong adlawa ang mga buhatan sa Comelec dili lang dinhi sa Sugbu kun dili sa tibuok kapupud-an tungod kay kini maoy adlaw nga tapuson ang rehistrasyon sa mga magparehistro alang sa barangay ug SK elections karong Oktobre 29.

Bisan pa man niini ang Comelec sa siyudad sa Sugbu magpadayon gihapon sa pagpanawat sa mga magparehistro hangtud sa Hulyo 28 sa sunod semana.

Giklaro hinuon ni Cebu City Election Officer Atty. Marchel Sarno nga ang ilang atimanon mao lang kadtong makasumitir sa registration form.

Gipadayag sa election officer nga sama sa nangaging mga adlaw 500 lang gihapon ka bag-ong mga registrants nga ilang maatiman karong adlawa, apan ilang ipabaha ang mga registration forms aron mahatagan niini ang tanang maglinya diha sa ilang buhatan.

Human mapirmahan ang nahisgutang porma mahimo na kining ibalik sa Comelec office ug ang naghupot niini hatagan og schedule pagbalik sunod semana aron kumpletuhon ang proseso.

Sa makausa pa nanawagan si Sarno sa mga Sugbuanon nga modalikyat sa ilang buhatan karong adlawa aron makakuha og porma.

Kini tungod kay kuli nang dunay ihatag nga extension sa Comelec registration, tungod usab sa kahagip-ot na sa panahon.