Programa sa dakbayan vs. irong libud-suroy milampos 'rong tuiga

Mas daghang libudsuroy nga mga iro sa dakbayan sa Sugbu ang nasikop sa city pound sa unang unom ka buwan niining tuiga.

Base sa talaan sa Animal Health Division moabot ngadto sa 4,637 ka mga iro ang gidakop lakip na niini ang boluntaryong gitugyan sa mga tag-iya.

Kini mas daghan kun itandi sa niaging tuig sa susamang mga buwan nga duna lay kinatibuk-ang 2,617 libud-suroy nga mga iro lakip na ang gitahan sa mga pet owners.

Mokapin sa 4,500 ka mga iro ang gipatay sa Animal Health Division niining tuiga samtang 2,476 lang ang sa unang unom ka buwan sa niaging tuig.

Apan usa sa maayong nakab-ot sa maong ahensya sa ilang mga programa lima lang ka rabies cases ang natala niining tuiga itandi sa susamang mga buwan sa niaging tuig nga dunay 24 ka kaso.

Samtang 18 usab ka mga barangay ang dunay mga kaso sa rabies sa niaging tuig itandi sa lima pa lang ka barangay niining tuiga.

Kini mao ang barangay Basak San Nicolas nga dunay duha ka rabies cases, samtang tag-usa ka kaso sa barangay Mabolo, Inayawan, ug barangay Lahug.