Fetus ang gitangag sa iro

Usa ka fetus nga gitangag sa iro ang napalgan niadtong Huwebes sa hapon sa usa ka residente sa 3rd street Carmen Ville, Barangay Poblacion dakbayan sa Talisay.

Sila si Inspector Leoncio Baligwat Jr. ang miresponde sa maong tawag human usa ka Jerome Tampus, 21, residente sa nahisgutang lugar ang nakakita sa usa ka iro nga adunay gitangag nga iyang gituohan nga monyeka diha sa likod sa balay sa ilang silingan nga si Josephine Labor, 75-anyos.

Apan nasuta ni Tampus nga puya diay nga bag-ong gihimugso ang gitangag sa  iro ug kan-on na unta kini hinungdan nga iyang gibugaw.

Si Tampus daling mipahibawo sa maong insidente sa kapolisan diha sa Barangay Poblacion.

Ang puya gidala sa mga polis diha sa Saint Francis Funeral Homes sa Barangay Bulacao sa nahisgutang dakbayan.

Ang kapolisan natahap nga naa lang sa duol magpuyo ang inahan nga milabay sa nahisgutang puya apan wala pa nila mailhi kun si kinsa kini.