Ex-con gipatay sa ex-con

Patay nang midangat sa tambalanan ang usa ka ex-convict human kini gipusil sa laing ex-convict nga iya rang kauban atol sa pagkanaog sa biktima sa gisakyang PUJ diha sa New Imus Road sa barangay Lorega-San Miguel niadtong milabay'ng gabii.

Ang namatay giilang si Jeffrey Igot Dayunon alyas Dodong, 26, taga sitio Lower Malibo, barangay Subangdaku dakbayan sa Mandaue, samtang ang suspek naila lang sa pangalan nga Kakay.

Matud pang PO1 Edario Manatad sa Homicide Section sa pakighinabi sa Banat News napriso tungod sa kasong pagpangawat si Dayunon ug niadtong Marso 2006 lang kini nakagawas sa Bagong Buhay Rehabilitation Center.

Samtang gitug-an ni Manatad nga ang kapuyo sa biktima mitug-an nga si Kakay kauban kaniadto ni Dayunon sa BBRC. Sayo pa nianang hapona miabot ang suspek sa ilang balay ug gidala ang biktima dinhi sa Sugbu.

Apan diha palang pagkanaog sa PUJ kalit nga gipusil sa suspek ginamit ang wala matinong kalibre sa armas ang biktima. Patay na kining nidangat sa CCMC dihang gidala sa mga sakop sa Mobile Patrol Group nga si PO1 Giovanni Frasco.

Ang biktima dunay igo sa bala katulo diha sa likod ug pulos milapos diha sa dughan nga maoy gituohang nakaingon sa kamatayon niini. Samtang gisusi pa karon sa kapolisan ang motibo sa pagpatay.