Fixer sa LTO gikonbikto’s korte

Gikonbikto sa korte ug gipahamtangan og silot nga pagkabilanggo sulod sa 11 ka adlaw ang gidudahang fixer sa Land Transportation Officer (LTO) sa dakbayan sa Mandaue.

Si Municipal Trial Court in Cities (MTCC) branch 3 Judge Wilfredo Dagatan mikonbikto kang Emmanuel Cosi gidudahang usa ka fixer ug molupyo sa  Looc, Mandaue subay sa gipakanaog nga hukom niini kagahapon sa buntag.

Gawas niini gimanduan sa korte si Cosi pagbayad og P200  nga multa ngadto sa kadaut nga iyang nahimo ngadto sa mga reklamante.

Nagumikan kini sa kasong unjust vexation nga gipasaka ni Dr. Danny Dionzon ug usa ka Arthur Burden nga gipasaka niadtong bulan sa Disyembre sa tuig 2005.

Matud pa si Cosi maoy nagkumbinsir kang Burden aron dili magpa-drug test sa klinika ni   Dionzon hinungdan nga gipasakaan sa maong kaso si Cosi.

Nasayran nga pagkakaron, nabilanggo na si Cosi nga nag-atubang og kasong illegal possession of firearms sa wala pa ikapakanaog ang maong desisyon sa korte.