Gibakwi sa mga sakop sa Integrated Bar of the Philippines-Cebu City Chapter ang lakang pagsupak sa gihugonhugong pagtudlo ni Assistant City Prosecutor Mary Ann Castro isip acting Regional State Prosecutor, hulip ni RSP Antonio Arellano nga idestino na sa Davao.
Kini maoy gipahibalo sa presidente nga si Atty. Briccio Boholst human sa taastaas nga deliberasyon sa mga sakop sa board gumikan kay si Justice Secretary Raul Gonzales mipahibalo na nga dili si Castro ang palingkuron isip regional state prosecutor tungod kay lain ang iyang itudlo.
Matud pa ni Boholst nga mahulog na nga moot and academic ang ila unyang aksyon nga gitinguha nga kababagan ang pagtudlo kang Castro sa puwesto, human ubay-ubay sa ilang mga kaubanang abogado wala mahimuot niini.
Nasayran nga naukay ang mga abogado ug mga tinugyanan sa korte sa dihang gipahibalo nga si Castro maoy molingkod isip hulip kang RSP Arellano kinsa idestino na sa rehiyon 11 nga magbase sa Davao.
Ang taho gihimakak ni Catro. Sa dihang nahinabi sa DyLA, siya nagkanayon nga nahimutang na siya sa maayong posisyon apan kun tawagon sa ilang uluhang buhatan anha pa siya modesisyon