Ang kalambigitan sa negosyo o babaye ang mga anggulo nga gisubay sa kapolisan sa kamatayon sa usa ka Japanese national nga negosyante nga gipusil sa wala mailhing mga mamumuno nga nagsakay og motorsiklo.
Nahitabo ang pagpamusil alas 12 pasado ang takna sa miaging gabii sa ganghaan sa gipuy-an niining apartment nga nahimutang sa Sitio Orel, Banilad, Mandaue.
Si PO2 Rey Manatad miila sa biktima nga mao si Tarro Suda, 36, ulitawo ug tagdumala ug usa sa mga tag-iya sa Kamitose Restaurant sa Cabancalan ug nagpuyo sa maong dapit.
Si PO2 Manatad nga gikahinabi sa Banat News miingon nga ang biktima nanaug gikan sa iyang sakyanan dihang giablihan niini ang gate sa iyang apartment.
Mobalik na unta kini sa pagsakay sa iyang sakyanan alang sa pagpasulod paingon sa garahian apan kalit lang kining gisugat sa upat ngadto sa lima ka wala hiilhing mamumuno nga nagsakay og motorsiklo ug gipusil ang biktima sa makadaghan.
Dugang pa ni PO3 Manatad nga nakabaton og daghang samad pinusilan ang kalawasan sa biktima ug dali unta kining gidala sa North General Hospital sa Talamban apan gideklarar kini sa mga doktor nga patay na nga nahidangat kanila.
Sa pasiunang imbestigasyon nasayran nga nakigbuwag ang biktima sa kapuyo niining babaye nga maoy hinungdan nga nag-inusara na lamang kining nagpuyo sa apartment diin usab siya gipusil sa iyang pagpauli.