Usa ka Field Training Policeman (FTP) gireklamo tungod kay nangulata og minor de edad sa dalan Garfield, Suba ning dakbayan sa Sugbu sa miaging Domingo sa gabii.
Ang polis nga gireklamo og kasong child abuse giila nga si PO1 Gilbert Igot nga nagpuyo sa samang lugar diin nahitabo ang insidente ug nadestino sa Criminal Intelligence and Investigation Bureau (CIIB).
Base sa impormasyon nga nakuha sa Banat News gikan sa Cebu City Police Office, ang polis gipaubos karon sa imbestigasyon tungod sa alegasyon nga pagpangulata ngadto sa batan-on.
Matud pa nga hubog na daan ang polis sa dihang gipa-push up ug gisikadsikaran ang 17-anyos nga batan-on sa miaging Domingo sa gabii.
Matud pa sa batan-on nga sa dihang nagtan-aw siya og basketball game sa Alaska ug Talk and Text sa telebisyon uban sa iyang amigo nga usa usab ka minor de edad nga anak sa barangay kapitan sa Suba nga si Jojo Sable, ang suspetsado nga silingan ra sa biktima kalit nga misulod sa balay sa biktima sa dihang nakadungog kini sa panagsabot tali sa duha ka batan-on.
Matud pa sa batan-on nga adunay nahitabong panaglalis tali niya ug sa iyang amigo tungod kay pareho sila unta og team nga pustahan nga mao ang Alaska apan nagdumili sa pagpusta sa pikas team ang amigo sa biktima.
Sumala pa sa biktima nga sa dihang nadunggan sila sa polis nga nagkalalis misulod sa ilang balay ug nangutana kun unsa ang ilang gikalalisan.
Ang polis nga nakainom mimando sa pag-push up atubangan niya.
Matud pa nga sa dihang miuyon sa gimando sa polis gisikadsikaran kini sila samtang nag-push up ug dayon mipahawa ang polis sa balay sa biktima human mituman sa sugo niini.
Human sa insidente ang batan-on mipablotter ngadto sa barangay hall sa Suba ug sa San Nicolas Police Station mahitungod sa gibuhat sa polis.
Bisan pa man og gipa-blotter sa biktima ang maong insidente nakadesider kini nga moadto sa DyHP inubanan sa iyang iyaan tungod usab sa kahadlok nga basin og mang-harrass kini kay silingan ra kini nila.
Apan ang estasyon sa DYHP mi-advise ngadto sa iyaan sa batan-on sa pag sang-at og complaint sa Cebu City Police Office ug giduso kini ngadto sa Internal Affairs Service.
Matud pa ni SPO2 Antonio Dicdican nga posibleng mapasakaan og kasong physical injuries in relation to child abuse law ang maong polis tungod sa gihimo niini ngadto sa menor de edad.