Akrho ug Tau gipusil

Usa ka miyembro sa Akrho ug laing miyembro sa Tau Gamma Phi ang gipamusil sa tulo ka wala ilhing mga lalaki nga nagsakay og motorsiklo samtang nag-istoryahanay daplin sa kalsada sa miaging gabii diha sa Sitio Bonbon, Catarman Liloan.

Ang mga biktima giila sa kapolisan nga mao si Jerson Jabagat Negro,  23, ulitawo, Akrho, Christopher Anore,  30, ulitawo, Tau Gamma member, pulos residente sa nahisgutang lugar.

Tulo ka mga lalaki luwan sa Aura nga motorsiklo  ang gitumbok nga namusil sa mga biktima.

Sila si PO3 Ricardo Enriquez ug PO3 Michael Mendoza daling miresponde apan pakyas sa pagsikop human misibat ang tulo ka wala ilhing mga lalaki sa crime scene.

Sa gihimong follow-up ni PO3 Ernesto Ponce Pepito Jr. ug PO3 Michael Mendoza sulod sa tambalanan sa Vicente Sotto Memorial Medical Center sa dakbayan sa Sugbu diin gidala ang mga biktima, ang duha ka biktima niasoy nga samtang sila nag-istambay ug nag-istoryahanay sa nahisgutang lugar uban sa ilang higala nga si   Jubenal Basco kalit lang niabot ang motorsiklo sakay ang tulo ka lalaki.

Igo lang nilabay sa ilang atubangan apan sa pag-abot sa unahan nibalik ug nihunong sa ilang nahimutangan, usa sa duha ka mga angkas sa motorsiklo ang nibunot sa wala matinong kalibre sa armas dayong pamusil ngadto kanila.

Si Negro naigo diha sa tuong batiis samtang si Anore naigo sa liog ug maayo kay nasuwertihan si Basco kay wala maapil sa pagkaigo.

Usa sa gisundan karon sa imbestigasyon sa kapolisan nga posibleng dunay kalambigitan sa fraternity nga maoy nagpaluyong motibo sa krimen.

Si SPO3 Carlos Flores nga nahinabi sa Banat News niingon nga wala pa sila mahibalo kun unsa na ang kahimtang ni Anore kay naigo man kini sa iyang liog.

Matud niya nga padayon pang nihimo og imbestigasyon ang iyang mga kauban sa maong pagpamusil ug wala usab nila isalikway ang uban nga anggulo gawas sa fraternity related.