Iregularidad sa VCS susihon

Imbestigasyon batok sa mga sakop sa Vice Control Section kabahin sa giingong iregularidad sa pagpasaka nila og kaso batok sa usa ka gidudahang notadong drug pusher sa Villagonzalo 2 sa Tejero buot nga himuon diha na sa buhatan sa Internal Affairs Service.

Si Sr.Supt. Patrocinio Comendador mitug-an sa mga tigbalita nga aron dili dudahan ang CCPO iyang irekomendar nga ang IAS nalang maoy moimbestigar sa kaso batok sa grupo ni PO3 Jeffrey Larobis.

Ang grupo ni Larobis midakop kang Enrico Dequitos niadtong Biyernes sa hapon. Sumala pa ni Insp. Wilbert Parilla sa dihang gihinabi niadtong Sabado dunay gihimong saturation drive ang iyang mga sakop sa maong dapit.

Gikatahong nakit-an sa iyang mga sakop si Dequitos nga naghupot og usa ka putos nga dihang ilang gisusi gidudahang shabu ang sulod niini hinungdan sa iyang pagkadakop.

Apan sa report nga gihatag sa grupo diha sa buhatan ni Comendador nasayran nga naatlan si Dequitos ug ubang mga silingan nga nagduwa og ‘tong-its’ niadtong tungura hinungdan nga ila kining gisikop tungod sa paglapas sa illegal gambling.

Human sa pagdakop gipangrekisa sila sa grupo ni Larobis ug diha na giingong makit-i ang usa ka bultong shabu sa posisyon ni Dequitos hinungdan sa pagkasikop niini.

Apan wala sa report sa VCS mo-reflect ang uban pang mga ebidensya sa pagdakop sa mga nagsugal sama sa baraha, pusta o ba kaha uban pang nagsugal niadtong tungura.

Usa ka silingan sa suspek nga mi-text sa mga tigbalita nagkanayon nga dili saturation drive ang gihimo sa VCS kundili buybust operation gyud apan human madakpi si Dequitos gikatahong nakig-areglo ang mga kabanay niini nga himuon nalang nga drug possession ang kaso.

Kini tungod kay ang suspek nga madakpan sa buybust bisan unsa ka gamay subay sa RA 9165 dili mahimong makapiyansa, samtang ang drug possession kun dili moabot og singko gramos dili tugutang makapiyansa apan kun ubos pa niini mahimo silang mopiyansa.

Hinuon matud pang Comendador kapin unom ka gramos ang maong drugas maong dili gihapon kini makapiyansa apan mipasalig nga pakigkitaan ang maong testigo aron kumbinsihon sa pagluwat og affidavit.

Matud pang Comendador mahimong adto sa IAS isang-at ang reklamo ug mahimo usab nga adto sa Ombudsman.

Dugang pa niya nga tutukan sa imbestigasyon kung unsa nga matang sa operasyon ang gihimo sa VCS kung buy-bust operation ba kini o saturation drive base sa nakita sa witness.

Sanglit sumala pang Comendador balido ang pagrekisa sa tawo kung duna na kini initial nga nahimong kalapasan sama sa illegal gambling.

Samtang gisabot usab ni Comendador ang samang kisaw batok sa iyang mga sakop tungod kay sagad gyud mahitabo ang susamang mga pagsaway ilabi na kung may kalambigitan sa drugas aron usab dauton ang mga polis.