Extension sa registration gihangyo

Pormal nga giduso ni Cebu City Election Officer for the South district Atty. Edwin Cadungog ang iyang letter request nga naghangyo sa Comelec Manila nga lugwayan og laing usa ka semana ang gipahigayong registration sa barangay og SK-election karung petsa 29 sa bulan sa Oktubre.

Kagahapong adlawa gibutyag ni Cadungog dihang nahinabi sa Banat News nga iyaha nang gi-finalize ang mao niyang suwat hangyo aron i-fax sa ilang ulohang buhatan sa Comelec.

Gipasabot ni Cadungog diha sa mao niyang suwat ang pag-awhag sa Comelec nga gikinahanglan gyud nga lugwayan og laing usa ka semana ang registration aron  maatiman nila ang gibanabanang subra sa 12 mil ka mga bag-ong botante sa barangay ug SK-election.

Hinuon giklaro ni Cadungog nga wala silay mahimo kung dili aprubahan ang mao niyang hangyo tungod kay igo lang siyang nipadayag sa iya karung namatikdan nga kagamay lang sa usa ka semana nga gitugot sa pagpangrehistro.

Hinuon suportado ni City Election Officer for the North Atty. Marchel Sarno ang maong lakang ni Cadungog ug matud niya ilaha na kining nasabutan.

Apan kulang og pagtuo si Sarno nga aprobahan kini sa Comelec en banc gumikan kay susama kining maong panghitabo sa mga nanglabay’ng registration diin walay lugway nga gitugot ang ilang ulohang buhatan.

Nasayran nga gibutyag ni Cadungog nga niining usa ka semana nga pagpangrehistro  makarehistro lang sila og 7 ngadto sa 8 mil ka mga bag-ong botante apil na sa SK.

Nakarehistro na sila og dul-an sa 2 mil ka mga bag-ong botante apil sa SK sa South district sukad gibuksan ang pagpangrehistro niadtong nilabay’ng Domingo.

Samtang gibutyag ni Sarno nga subra sa 2 mil nasab ang ilang narehistro sukad kagahapon nga ikatulo ka adlaw human gibuksan ang pagpangrehistro.

Nasayran sab nga sukwahi niadtong nilabay’ng mga adlaw dili na kaayo samok ug gubot ang naglinya nga mga tawong buot moparehistro tungod kay na-adjust na kini ug duna nay dugang mga bangko gipamutang ug wala nay gitugutan nga makapataka og sal-ot sa linya.