Nalatayan ang ulo pisat

Duha ang patay, usa kanila napisat ang ulo human makatayi og minibus ang ulo samtang usa ang naangol sa disgrasya sa kadalanan sa managlahing dapit dinhi sa lalawigan sa Sugbu.

Patay diha dayon si Danilo Demol,33, residente sa barangay Lupa lungsod sa Compostela ug Rodolfo Elacion Carbajosa, 37, nga residente sa barangay Canamukan lungsod sa Compostela ang naangol usab kinsa nagsunod sa minibus luwan sa iyang motorsiklo.

Giila ni PO2 Pedro Borinaga sa Sogod Police station ang nakadasmag sa duha mao si Manolito Flores, 36, taga   Catmon nagmaneho og usa ka pasaheroang mini bus padulong sa Sogod gikan sa dakbayan sa Sugbu.

Matud pa ni PO2 Borinaga pareho og direksyon pangadto sa norte ang suspek ug ang duha ka biktima sakay sa managlahing sakyanan, diin si Demol luwan sa iyang motorsiklo ug si Carbajosa usab sakay sa iyang kaugalingong motor.

Gikatahong si Flores nagsunod kang Demol niadtong tungura ug misuway unta sa pag-overtake apan nagduha-duha kini maong mibalik kini sa iyang pwesto.

Sa pagmaniobra niini nasaghiran niini ang motorsiklo ni Demol hinungdan nga nawad-an og kontrol ang naulahi ug natumba,  hinungdan nga nalatayan gyud ang ulo sa biktima hinungdan sa hinanali niining kamatayon.

Si Carbajosa nga nagsunod sa minibus nakugang sa hitabo ug nawad-an usab og kontrol ug adto misampak sa minibus hinungdan sa mga bun-og sa ulo ug kalawasan nga iyang naangkon.

Daling gidala sa tambalanan si Carbajosa ug luwas na sa makuyaw nga kahimtang, samtang si Flores mitahan sa iyang kaugalingon sa  Sogod police.

Samtang sa dakbayan sa Lapulapu, patay ang motoristang si Cesario Taneca,43, nga taga Bangkal sa maong dakbayan human kini mabanggai og multicab diha sa ML Quezon National Highway sa Pusok sa maong dakbayan.

Matud pa ni PO3 Ruel Nalzaro sa traffic section usa ka Ruel Arcenal, 30, nga taga Umapad dakbayan sa Mandaue maoy nagmaneho sa multicab nga nakadasmag sa biktima.

Si Arcenal mitug-an sa kapolisan nga padulong siya sa Mactan dihang kalit mi- U turn si Taneca nga wala magtan-aw sa pikas linya hinungdan nga iya kining nadasmagan.

Sumala pa ni SPO3 Bonifacio Sumalinog nga gihinabi sa Banat News ang biktima gikan pa nagpatubil og gasolina sa maong lugar ug paingon na kini ngadto sa Mepza dihang nadagit.

Gumikan niini nalagpot si Taneca ug maayong pagkapantok ang ulo sa dalan ug gidali pagdala sa Mactan Doctors Hospital apan gideklarar kini nga DOA. Samtang si Arcenal mitahan sa kapolisan.

Nasayran nga si Taneca gwardiya sa MCIA apan koresponsal usab sa sibyaanang Bantay Radyo.