Skywalks tangtangag atop aron di puy-an

Nagplano karon si Mayor Tomas Osmeña nga panangtangan og atop ang mga skywalk dinhi sa dakbayan sa Sugbu aron dili na puy-an ug himuong tulugan sa mga libud-suroy.

Kini subay usab sa rekomendasyon sa City Traffic Operations and Management  human madiskubreheng gihimo na kining pinuy-anan sa mga makililimos ug sa ubang naglatagaw sa kadalanan ang mga skywalk sa siyudad.

Apan giklaro sa mayor nga kinahanglan unang mananghid ang dakbayan sa Department of Public Works and Highways kun DPWH-7 isip implementor sa mga skywalk.

Dili hinuon ang tanang skywalk sa siyudad maoy gusto sa mayor nga dunganon paghukas ang atop kay buot niining duna unay eksperimento kung epektibo ba kini.

 Gisugyot ni Osmeña ang skywalk diha sa Fuente Osmeña tungod kay daghang namuyo nga mga makililimos ilabina panahon sa kagabhion gawas nga kini gitindahan usab.

Apan usa ka kanhi opisyal sa siyudad nga dili gustong magpahingan nipadayag  nga ang maong lakang nagpakita lang nga pakyas ang dakbayan paghipos sa mga makililimos.

Kini bisan pa man sa anti-mendicancy ordinance sa siyudad nga ilang naaprubahan kaniadto sa ilang panahon.

Dakong supak ang nahisgutang kanhi konsehal nga tangtangan og atop ang mga skywalk tungod kay kini makatabon sa kainit sa panahon ug mapasilungan panahon sa ting-uwan.

Nagtoo ang kanhi konsehal nga kung tangtangan og atop ang mga skywalk mosamot nga wa nay mangagi niini.