20 porsiyentong E-VAT para Sr. Citizens iduso

Giawhag ni Cebu City Councilor Edgardo Labella ang Kongreso nga tun-an ang posibilidad pag-amendar sa Expanded Value Added Tax kun E-VAT law.

Buot sa konsehal nga mahatagan og exemption ang mga senior citizen sa dose porsiyentong E-VAT ilabina sa mga medisina.

Ang konsehal gikatakdang mopalabang og resolusyon atol sa sesyon sa city council karong Miyerkules tungod sa tinguhang maprotihian ang katungod sa mga senior citizen.

Sumala sa konsehal nga inay 20 porsiyento nga diskwento ang makuha sa mga senior citizen sa mga palaliton 8 porsiyento na lang karon tungod sa E-VAT.

Giklaro ni Labella nga polisiya sa estado ang paghatag og igong social services ug proteksyon sa mga senior citizen subay sa Akta Republika 9257 kon ang Expanded Senior Citizens Act of 2003.

Usa sa mga probisyon sa nahisgutang balaud mao ang paghatag og 20 porsiyento nga diskwento sa mga senior citizens sa tanang paliton niini.