Faelnar mihangop sa balaudnon ni Gullas

Gihangop ni ABC president Jingjing Faelnar ang balaudnon nga gipalabang ni kongresista Eduardo Gullas sa unang distrito sa Sugbu ang Barangay Incentives Act.

Ang nahisgutang balaudnon sa kongresista maghatag og halapad nga incentives sa mga opisyal ug empleyado sa kabarangayan.

Kini sama sa tax previliges, igong social security ug kompletong health insurance coverage ug uban pa.

Matud ni Faelnar nga labihang nindota ang maong balaudnon tungod kay giingong mga kabus usab ang kadaghanan sa mga opisyal ug kawani sa barangay.

“I hope nga maaprubahan ang nahisgutang bill tungod kay dako kaayo na og matabang sa mga empleyado ug mga opisyal sa kabarangayan,” suma pa ni Faelnar.

Gani niingon si Faelnar nga ubay-ubay sa mga barangay employees, nagsalig lang sa honoraria alang sa ilang inadlaw-adlaw nga panginahanglan.

Nanghinaut ang ABC president nga dili kini babagan sa ubang mga magbabalaod. Duha ka rason ang gipadayag ni kongresista Gullas sa iyang lakang pagpalabang sa House Bill 317 kun ang Barangay Incentives Act.

Kini mao ang pagsiguro nga matinud-anong moserbisyo ang mga opisyal ug mga kawani sa kabarangayan ug ang ikaduha mapalambo usab ang kalidad sa ilang panginabuhi.