Korean national mikiha sa abogado sa BID-7

Usa ka opisyal sa BID 7 ang gipasakaan og kasong anti-graft ug grave misconduct sa usa ka Koreanong negosyante diha sa Visayas Ombudsman kagahapon sa hapon.

 Ang gipasakaan og kaso mao si Atty. Brandon Inad, usa sa legal officer sa buhatan sa BID 7 sa dakbayan sa Mandaue.

 Ang mireklamo mao si Cho Chang Je, usa ka Korean national ug usa ka stock holder sa Pado Dive Camp Resort Corporation nga nahimutang sa sitio Kalubihan, barangay Marigondon dakbayan sa Lapulapu.

 Inubanan sa abogado ni Cho nga si Atty. Luisito Arma mipadayag kini nga gumikan sa usa ka dako nga transaksiyon nga napakyas ang iyang P13 milyones nga transaksyon dihang siya gipugngan ni Inad nga makabalik sa Korea niadtong Hulyo 11.

 Giingong gipugngan ni Atty. Inad gumikan kay aduna kini pending nga kaso sa Department of Labor dinhi sa Sugbu ug kini naa sa DOJ watch list hinungdan nga kini nabiyaan sa eroplano ug napakyas ang maong transaksiyon sa maong negosyante.

 Gumikan niini mipasaka og reklamo si Cho sa Ombudsman Visayas ug posible pa kini nga mopasaka og laing kasong damages ngadto sa korte.

 Matud pa ni Atty. Arma nga way laing gitahod sa Immigration nga dokumento nga makapakgang sa usa ka langyaw sa pagbiya dinhi sa nasud kundi ang court order lamang ug bisan pa ang DOJ watchlist dili makapakgang niini.

 Gidudahan ni Cho nga dunay laing Korean national nga dunay kasuko kaniya nga mipaluyo niini gumikan kay amigo kini ni Atty. Inad.

Si Inad mihimakak sa maong alegasyon nga iyang gi-hold nga way basehanan ang langyaw kay matud pa niya nakadawat siya og impormasyon nga si Cho mobiya dinhi sa nasud ug dili na mobalik gumikan sa kaso niini sa labor nga aduna nay resolution nga pabayron na kini og 7.1 million sa labor.

 Hinuon matud pa ni Atty. Inad andam siya nga moatubang sa mga kaso nga ipasaka niini batok kaniya.