Gipanghimakak ni Jonathan Guardo nga magpapili siya isip barangay kapitan karong Oktubre nga eleksyon sa barangay diha sa Tisa, ning dakbayan.
Matud pa ni Guardo nga wala siyay plano sa paghupot og katungdanan sa barangay ug mas palabihon niya nga mag-focus lang una sa paghatag og suporta sa ilang mga lider diha sa south district karong umaabot nga eleksiyon sa Oktubre 29.
Dugang pa niini nga usa sa iyang gihimo karon mao ang pagpangandam sa kandidatura sa iyang manghod nga si Jason Guardo alang na sa pagka- barangay kapitan sa Tisa.
Wala usab kini magpasabot nga iya nang gisirhan ang politika.
Matud pa niini nga gihan-ay na nila ang kandidatura sa iyang manghod nga si Jason lakip na ang line-up niini diha sa Tisa.
Iya usab nga giklaro nga mosuporta usab siya sa iyang mga lider sa kabarangayan kini pinaagi sa pagbutang og mga kumpletong kandidato sa umaabot nga eleksiyon isip pagtabang usab sa iyang mga lider nga misuporta niya sa milabay nga eleksiyon.
Sumala pa niini nga ang eleksiyon karong Oktubre ila gyud kining gipangandaman sa ilang mga lider ug nahan-ay na ang tanan.
Kun masayran nga si Guardo dihang nagpapili isip kongresista sa south district kabatok kang Kongresista Antonio Cuenco naparot usab kini diha mismo sa kaugalingong presinto.
Bisan pa man niini iya kining gidawat ug mipadayag human sa eleksiyon nga mosuporta na karon ni Cuenco apan karong bag-o mipadayag nga iyang suportahan ang iyang mga lider alang na usab sa mga kandidato ni Cuenco karong barangay election.