Sheriff sa korte gisuwaya'g patay atol sa demolisyon

Usa ka sheriff sa regional trial court kinsa mipatuman sa demolition order gikan sa korte ang gibanhigan sa wala mailhing mga tawo niadtong Biyernes sa hapon dihang miayuda kini og pagpanglarot sa mga balay diha sa Sitio Catap, Barangay Banlot, lungsod sa Sibonga.

Si Elcid Caballes, 42, sheriff sa korte, ang miadto sa lungsod sa Sibonga sa nahisgutang adlaw aron pangulohan ang demolition team kinsa gisangonan sa paglarot sa 26 ka balay diha sa Sitio Ikan, Barangay Bato.

Ang nahisgutang lote nga gitukoran sa maong mga balay napamatud-an sa korte nga gipanag-iya kini ni Segundina Caban.

Si SPO3 Rudilito Carillo, polis sa Sibonga kinsa mi-escort ni Caballes, mibutyag nga niadtong Biyernes upat ka balay ang nalarot sa demolition team ug padayonon unta karong Lunes ang paglarot sa uban pang mga balay.

Matud ni Carillo nga sakay sila sa kolor green nga Nissan Urvan diin ang ilang gisakyan nagsunod sa gisakyan sa demolition team paingon na unta silang mobalik sa police station sa lungsod apan dihang duol na sila sa Sitio Ikan gipauwanan sila og mga bala sa wala mailhing mga tawo.

Ang maong mga suspetsado nahimutang sa medyo layo nga distansiya sa ilang nahimutangan.

Matud ni Carillo nga swerte kay nakabantay silang duha ni Caballes ug nakaambak gikan sa ilang gisakyan ug mibawos sa pagpabuto ngadto sa mga suspetsado.

Human sa maong hitabo ang mga suspetsado daling nanagan pahilayo sa lugar.

Ang grupo sa Regional Mobile Group-7 kinsa maoy convoy sa grupo sa demolition team   napakyas sa pagsikop sa mga mibanhig kanila.

Si Carillo midugang nga mipahigayon na sila karon og follow-up nga imbestigasyon kabahin sa hitabo diin ilang gidudahan nga duna kini kalabutan sa paglarot sa mga balay diha sa lugar.