Mang-rehistro na ang Comelec

Tulo ka adlaw na lang sa dili pa ang adlaw nga maoy pormal nga isugod sa pagpang-rehistro sa mga bag-ong botante karong adlaw'ng Domingo aron makabotar sa eleksiyon sa barangay ug Sangguniang Kabataan  karong  Oktubre 29, apan hangtod karon wala pay mga porma nga nangabot sa buhatan sa Commission on Election (Comelec) dinhi sa dakbayan sa Sugbu aron magamit sa registration.

Gitug-an kini ni Cebu City Election Officer Atty. Marchel Sarno dihang nahinabi sa Banat News ug gani  milarga dayon kini paingon sa Manila kagahapong adlawa aron sa pag-follow up sa maong mga porma.

Giklaro ni Sarno nga preparado na ang ilang buhatan alang sa pagpahigayon sa usa ka semana nga registration nga sugdan karong Domingo sa alas 8  sa buntag hangtod sa alas 7 sa gabii hangtod sa Hulyo 22 apan bugtong ang mga porma lang sa pagpangrehistro maoy ilang gipaabot.

Kadto lang mga bag-o pang mitungtong sa pangedaron nga 18 ug kadtong gustong mobalhin sa ilang pagbotar ang gitugotan nga makaparehistro ingon man kadtong napapas na sa voters-list tungod kay napakyas pagbotar sulod sa  milabay'ng duha ka mga milabayng eleksiyon.

Matud ni Sarno pagkakaron duna pay pipila ka mga porma nga sobra sa   milabay'ng registration niadtong May 14 nga eleksiyon kun sa higayon nga dili sila makakuha og mga bag-ong porma,  matud ni Sarno mao na lang kini  ilang i-photocopy aron i-apod apod ngadto sa mga magparehistro nga bag-ong botante.