Na-dengue sa Lapu 75 na kabuok

Miabot na sa 75 ka mga kaso sa dengue ang natala sa Lapulapu City Health Office sugod niadtong bulan sa Enero hangtod karong bulana.

 Si Stella Amoin, nurse supervisor sa City Health Office sa Lapulapu nga nahinabi sa Banat News nagkanayon nga base sa ilang talaan sukad pa niadtong bulan sa Enero niining tuiga hangtod kagahapon nasuta nga 51 sa 75 ka kaso sa dengue mga batang nagpangidaron og 14-anyos paubos.

Sa gidaghanon sa mga nataptan sa maong sakit, gikalipay sa mga opisyal sa Lapulapu ilabi na ni City Health Officer Rodolfo Berame nga walay gyuy nangamatay sa ilang mga pasyente, gumikan kay ila dayon kining giatiman sa ilang mga kinahanglanon kun kini anaa na sa mga tambalanan.

 Matud pa ni Amoin nga dako kaayo og ikatabang ang ilang gimugna nga Barangay Dengue Brigade ug School Dengue Brigade alang sa pagsumpo sa sakit nga dengue ug ang paglikay niini.

Pinaagi usab sa panag-alayon sa kadagkuan sa DepEd sa Lapulapu padayon gihapon ang ilang walay hunong nga kampanya sa pagsumpo sa dengue ilabi na kay giapil usab kini sa mga subject sa kabataan ang mga butang nga makapadaot sa panglawas sa tawo ug kabataan ilabi na ang  sakit nga dengue.

Gumikan niini, gihangyo ni Amoin ang mga ginikanan ug mga residente sa Lapulapu nga mag-igmat sa pagsumpo sa maong sakit ilabi na niining panahona nga tempo ang pag-ulan-ulan sa nasud.