Mga bata nga nanaglatagaw i-rescue nasab

Gipaabot ang sunod-sunod na usab nga pagpang-rescue sa kabataan nga naglatagaw sa kadalanan sa dakbayan sa Sugbu sa sunod buwan.

Kini tungod usab sa pag-obserbar sa tibuok buwan sa Agosto isip Anti-Mendicancy Month sa siyudad.

Ang chairman sa Committee on Social Services sa Konseho konsehal Rodrigo Abellanosa miklaro hinuon nga tibuok tuig kining  himuon sa dakbayan.

Apan giangkon sa konsehal nga wala gihapon masumpo ang maong problema ilabi na ang mga bata nga nagpakilimos sa kadalanan.

Kini tungod usab sa giingong naghari nga kaluoy sa mga tawo ngadto sa mga makililimos nga mangayo og limos.

Tungod niini subling gipahinumduman ni   Abellanosa ang mga Sugbuanon nga ang paghatag og limos maayo apan sa dalan dili husto.

“The more we practice kanang maluoy mohatag ta, the more hinuon nga nag-encourage ta nila nga magsige og pakilimos sa kadalanan,” sumala pa sa konsehal.

Gisugyot ni Abellanosa ngadto sa mga Sugbuanon nga dunay malumo nga kasingkasing nga adto motunol sa ilang hinabang sa mga charitable institutions.

Miingon ang konsehal nga mahimo usab nga ihulog ang tabang niini sa mga drop boxes sa nagkadaiyang mga tindahan sa dakbayan nga dunay programa alang sa streetchildren.

Sumala pa  sa konsehal nga sa ingon niini nga paagi, dunay klarong padulngan ang kuwarta nga ihatag isip tabang sa kabataan.

Nakadawat og taho si Abellanosa nga ang kuwarta nga mahipos sa pipila ka mga bata nga nagpakilimos, ila ra usab nga ipanugal.

Ang konsehal mitataw nga kini masumpo lang kun ang mga tawo mismo motabang sa kampanya sa dakbayan pinaagi sa dili niini paghatag og limos diha sa kadalanan .