Magtiayon nabangga sa lamppost, patay

Magtiayon namatay human madisgrasya sa motorsiklo nga ilang gisakyan sa dihang nalamba ngadto sa lamppost sa U.N. Avenue sa ikaduhang taytayan kagahapon sa buntag.

Ang namatay mao ang magtiayong Ryan Mahinay Sanchez, 24, nagmaneho sa motorsiklo ug ang iyang asawa nga si Loida Sanchez, nagtrabaho sa Global Wear Manufacturing Inc. sa MEPZA ug mga residente sa Sitio Sampaguita, Lamac, Consolacion.

Base sa imbestigasyon ni SPO1 Joel Catabas sa Traffic Division sa Mandaue, nasayran nga samtang padulong ang magtiayon ngadto sa Lapulapu agi sa Marcelo Fernan Bridge alang sa paghatod ni Loida ngadto sa iyang gitrabahoan sa MEPZ kalit lamang kini nawad-an og kontrol sa iyang gimanehong motor hinungdan nga kini nadisgrasya sa karsada.

Matud pa sa usa ka saksi nga layo kaayo ang gilagputan sa magtiayon gumikan sa kakusog sa ilang pagpadagan ug gani nabuak usab ang ilang mga helmet nga gisul-ob ug ang mga bulak nga anaa sa kilid sa maong dalan naharos hangtod nga nabunal ang duha sa usa ka lamppost.

Gidali pagdala sa mga sakop sa ERUF ang magtiayon sa Mactan Doctors Hospital apan gideklarar nga dead on arrival si Ryan samtang wala usab makaantos si Loida sa iyang nahiagumang mga samad ug bun-og sa kalawasan, namatay usab kini pipila ka oras nga pagtabang sa mga mananambal.

Si SPO1 Catabas miingon nga posibleng nakatagpilaw si Ryan samtang nagmaneho subay sa maong dalan, gumikan kay wala silay nakita nga babag sa dalan nga ilang giagian atol sa ilang pag-imbestigar niini.