Kolumnista 'naghikog'

Gisusi karon sa Homicide Section sa Cebu City Police Office ang kamatayon sa usa ka kolumnista sa pamantalaan nga gikatahong naghikog niadtong Biyernes sa hapon ug namatay sa Chong Hua Hospital pagka-Domingo na sa kaadlawon.

Ang namatay giilang si Ana Maria Escalante-Neri, 29, kolumnista ug speech therapist ug nagpuyo sa dalan Ramon Aboitiz, Camputhaw ning dakbayan.

Ang amahan sa biktima nga si Edward Escalante midangop ni Police Regional Office – 7 Deputy Regional Director for Administration Chief Supt. Ronald Roderos ug nangayo og tabang aron ma-imbestigar ang kamatayon sa iyang anak.

Lakip sa gihangyo sa pamilyang Escalante nga ipa-awtopsiya sa PNP Crime Laboratory ang patay’ng lawas ni Ana Maria.

Ang grupo nilang PO3 Rogelio Nedamo, PO3 Henry Estoy ug PO2 Buenaventura Ursaiz misusi sa Chong Hua Hospital niadtong Biyernes apan wala moatubang kanila ang bana ni Ana Maria nga si Atty. Jerome Dominic Neri tungod sa ka-bisi niini pag-atiman sa iyang asawa.

Ang ugangan ni Ana Maria nga si Atty. Julius Neri maoy miatubang sa mga polis ug mipasalig  nga mobisita sa ilang buhatan aron paghatag og pamahayag.

Si. Insp. Mario Monilar, hepe sa Homicide Section, mitug-an nga ang mga Neri nakig-coordinate sa National Bureau of Investigation-7.

Matud pa sa imbestigasyon sa Homicide Section nga ang bana ni Ana Maria nga si Atty. Jerome Dominic Neri didto sa panimalay sa iyang ginikanan sa Bahuna Drive sa Banilad atol sa hitabo.

Gitawagan niya sa cellphone ang biktima apan wala motubag ug sa iyang pagpauli walay mitubag sa iyang pagpanuktok. Gamit ang paintbrush ug doorknob, giablihan niya ang pultahan apan iyang nakit-an ang iyang asawa nga nagbitay na gamit ang wire nga gihigot sa liog nga gihikot ngadto sa handle sa cabinet.

Gihatod sa iyang bana si Ana Maria sa ospital inubanan sa drayber sa maguwang niini nga si Proceso Alquizola, usa ka giilang Danny ug usa ka nailang Nene nga ilang katabang.

Ang Homicide Section nakahipos og mga ebidensiya nga ilang gamiton alang sa lawom nga imbestigasyon kalabot sa kamatayon ni Ana Maria.