....PTCA mi apelar ni Tom

Mi-apelar na ngadto kang Mayor Tomas Osmeña ang Parents-Teachers Community Association (PTCA) diha sa Lahug Elementary School sa hukom sa mayor pagkanselar sa katukoran sa school building diha sa nahisgutang tunghaan.

Kini bisan pa man sa desisyon ni Osmeña nga ibalhin na ang nahisgutang proyekto ngadto sa Barangay Talamban ug posibling sa sunod tuig na matigayon ang katukoran sa dugang classroom diha sa maong tunghaan.

Ang presidente sa PTCA nga si Konsehal Augustus Pe Jr. miklaro nga wala silay laing mahimo sa desisyon ni Osmeña gawas sa paghangyo niini nga mapadayon ang pagtukod sa nahisgutang school building niining tuiga.

Giklaro sa konsehal nga dako og ikatabang sa mga tinun-an sa Lahug ang dugang mga lawak-saringan tungod usab sa naghinobra nga mga tinun-an diha sa nahisgutang tunghaan.

Gipadayag ni Pe nga sila mismo sa PTCA maoy mihangyo sa School Board ug ni City Hall Education Consultant Joy Augustus Young nga matukod ang dugang lawak-saringan aron kahatagan og solusyon ang maong problema.

Kini human masuta sa konsehal ug sa iyang mga sakop sa PTCA nga nanginahanglan og dugang 18 ka classroom ang Lahug Elementary School alang sa hamugaway nga pagtuon sa mga tinun-an.

Sa pagkakaron miingon si Pe nga nagpabilin gihapon ang “two-shift” sa ubang klase sa mga tinun-an diha sa Lahug mugna sa kakuwang sa classroom.

Sa pikas bahin, nagdumili pagkomentaryo ang konsehal sa fund-raising campaign nga gipasiugdahan ni Lahug barangay Captain Mary Ann Delos Santos, ang “Piso mo, Eskwelahan ko.”

Ang konsehal nga kaalyado ni Osmeña nagdumili usab pagtubag kun kini mosuporta ba sa kawsa sa kapitan.

Sumala pa ni Pe nga anaa na sa incoming officers sa PTCA kun unsa ang angayan niining buhaton tungod kay giingong hapit na mapupos ang iyang termino isip presidente sa PTCA diha sa nahisgutang tunghaan.