Mary Ann may ‘warning’ gikan ni Tom

Gipahinumdoman karon ni Mayor Tomas Osmeña si Lahug barangay Captain Mary Ann delos Santos nga mosubay sa balaod pagpangayo og hinabang sa laing lokal nga kagamhanan.

Kini human masayod ang mayor nga andam mohatag og P5 milyones ang kagamhanang probinsyal human ilusad ni delos Santos ang fund raising driver niini nga “Piso mo, Eskwelahan ko.”

Kini human usab kanselaha ni Osmeña ang P15 milyones nga school building diha sa Lahug Elementary School tungod sa giingong pagpamakak sa kapitan nga walay natabang ang siyudad diha sa nahisgutang barangay.

Matud sa mayor nga mahimong makwestyon ang solicitation kun walay permiso gikan sa hingtungdang mga ahensya sama sa Department of Social Welfare and Development (DSWD) ug uban pa.

Kini gihulagway ni Osmeña nga usa ka kalapasan sa anti-graft law “Because that’s in the public interest that there is accountability and transparency,” nagkanayon ang mayor.

Gawas niini gipahinumdoman usab ni Osmeña si delos Santos nga dili kini mahimong motukod og building sama sa plano niining school building kun dili mosubay sa tukmang proseso.

Sumala sa mayor nga kinahanglang mangayo una ang kapitan og permiso gikan sa City Hall sa dili pa matukod ang nahisgutang building.

“It is in their interest to follow the law. I cannot amend the law. It’s not dictatorship. All she (Mary Ann) has to do is read her oath of office,” matud ni Osmeña.

Giklaro sa mayor nga igo lang niya nga gipahinumdoman ang kapitan sa kinahanglang buhaton tungod kay kini dili makahimo og bisan unsang lakang pagtukod og tunghaan kung way pagtugot gikan sa City  Hall.