Hapsay ang pagbukas sa klase

Gihulagway ni Sr.Supt. Patrocinio Comendador direktor sa Cebu City Police Office nga hapsay ug malinawon ang unang adlaw sa pagbukas sa klase kagahapon dinhi sa dakbayan.

Gatusan ka mga polis ang gipakatap sa dakbayan ilabi na duol sa mga tunghaan aron pagsigurong luwas ang mga tinun-an sa pagbukas sa klase, gilangkuban kini sa mga patrol cars ug mga beat patrols.

Hinuon dili tanang mga tunghaan nakasugod dayon sa klase sanglit dunay mga nagpadayong nanawat og mga enrollees apan sagad sa mga pampublikong tunghaan naghinay-hinay na sa ilang mga leksyon.

Si Comendador nagkanayon dili pa hinuon maisip nga malampuson gyud ang pagpangandam sa Oplan Balik Eskwela sa kapolisan sanglit sa sunod semana pa magsugod ang klase sa mga kolehiyo nga diin sagad naggikan ang mga miyembro sa mga fraternity.

Sumala pang Comendador, ang mga hepe sa mga police station diin masakop ang mga tunghaan mohimo og komunikasyon sa mga administrador sa mga tunghaan kabahin sa mga kalihukan sa fraternity.

Matud pang Comendador ang problema sa fraternity masulbad ra diha palang sa level sa mga tunghaan diin sila magbase, samtang ang kapolisan mohimo sa ilang trabaho isip tigpatuman sa balaod kung dunay makasala sa mga miyembro sa maong mga grupo.