Desisyon ni Tom girespeto ni Young

Ang consultant on education sa dakbayan sa Sugbu, Joy Augustos Young miingon nga maabtan pa unya siya sa usa ka bulan nga pag-evaluate sa kahimtang sa mga tinun-an diha sa barangay Lahug subay usab sa lakang ni Mayor Tomas Osmeña pagpakgang sa P15 milyones  nga pagtukod og eskwelahan sa maong lugar.

Si Young mitataw nga sa pagkakaron magpaabot lang una siya sa pagbukas sa klase kun unsay dagan sa mga tinun-an diha sa Lahug labot sa kakulang nilag tunghaan.

Matud pa  sa consultant nga  sa pagkakaron dili pa siya makahimo sa pag-istorya kang mayor Osmeña,  inig ka human   na lang sa usa ka bulan nga iyang pag-evaluate sa kahimtang sa mga tinun-an alang na sa report nga iyang iduso sa mayor.

Suma pa ni Young, ang mayor na unya maoy modeterminar niini kun ipadayon ba ang pagtukod sa maong proyekto diha sa Lahug kun makakita na sa iyang report tungod kay karong mga panahona sa pagbukas sa klase daghan pang mga kausaban ang mahitabo.

Si Young nagkanayon nga  mamahimong mosaka ang mga tinun-an o kaha mukonhod kini base usab sa pagbalhin unya sa ubang mga estudyante o kaha dili na mopadayon sa pagtungha karong tuiga.

Hinuon kompiyansa  si Young nga mausab  ang baroganan sa mayor kun makita unya niini kun unsay resulta sa iyang evaluation hinungdan nga iya kining gi-respeto sa pagdesisyon niini nga dili lang usa magtukod og bag-ong tunghaan. Nunot niini iyang   gipasabot nga huwaton  lang una niya karong sunod semana hangtud na sa usa ka bulan kun unsa gyud ang sitwasyon sa mga tinun-an una pa mohatag og kompleto nga detalye niining maong isyu.