Wanted misukol sa mga polis napusilan

Usa ka wanted tungod sa kasong murder ang napusilan sa polis sa lungsod sa Lilo-an tungod kay misukol kini dihang gisikop kagahapon sa hapon diha sulod sa Tonef Video Haus sa Barangay Yati sa nahisgutang lungsod.

Ang suspetsado mao si Dindo Pilapil Garbo, 38-anyos, residente sa Sitio Tagaytay, Barangay Calero, Lilo-an ang nakaangkon og samad pinusilan sa iyang mga paa human kini pusila ni SPO1 Ricardo Garbo Judaya sa Cordova MPS. Daling gidala sa mga polis diha sa Vicente Sotto Memorial Medical Center niining dakbayan ang suspetsado.

Si Garbo nasakmitan og usa ka kalibre .357 nga revolver, tulo ka basiyo sa bala sa maong pusil ug duha ka paketeng shabu nga gisulod diha sa iyang bulsa.

Dala nila ni Judaya, SPO2 Rufino Valdez Grancho, SPO1 Joseph Arondia Torlao, PO3 Marcelino Bantolay Servilla, PO3 Marlon Durban Yrog-yrog ug PO3 Ernesto Ponce Pepito  ang warrant of arrest nga giluwatan ni Regional Trial Court Judge Mercedes Gozo Dadole sa branch 28 dakbayan sa Mandue batok ni Garbo dihang gisikop kini sa maong mga polis.

Si SPO1 Jose Martinez polis sa Lilo-an mibutyag kagahapon sa Banat News nga si Garbo gidis-armahan kini ni Judaya.

Gitukmod ni Garbo si Judaya ug natumba kini sawog ug nahitabo ang panaglayog tungod kay buot iligon  pagbalik sa suspetsado ang iyang pusil gikan sa polis.

Sa maong hitabo napugos si Judaya sa pagpusil ni Garbo  hinungdan nga misulod sa video haus  ang uban pang mga polis  ug gisikop si Garbo.