Lalaki gituohang gi-salvage napalgan sa lungsod sa Consolacion

Usa ka wala hiilhing lalaki nga gituohang gi-salvage ang napalgan nga kagahapon sa buntag  nagbuy-od sa bakanteng luna sa Hilltop, barangay Casili, lungsod sa Consolacion.

Si PO2 Rodel Pilapil nga gikahinabi sa Banat News miingon nga ang maong lalaki   kasarangan lamang ang panglawas ug  gibanabana nga anaa sa 30 kapin ang panuigon.

Matud pa niya nga nagsul-ob kini og t-shirt nga may marka nga Mandaue City Charter  Day celebration nga ang kalawasan nabulit sa mga samad pinusilan.

Si PO2 Pilapil miingon nga ilang gitubag ang maong alarma human usa ka Estrella Urongan nga barangay tanod sa maong lugar  ang  mitawag kanila.

Ang pipila ka lumolupyo sa maong dapit mitug-an nga nakabati sila’g mga boto sa armas mga alas 3 pasado ang takna sa kaadlawon.

Ang patay’ng lawas sa maong wala hiilhing lalaki ang temporaryo karong gipahiluna sa Mandaue Funeral Home sa Ibabao, dakbayan sa Mandaue.