Tulo ka Internet café sa dalan Junquera sa barangay Kamagayan ang gironda sa mga sakop sa Pilipinas Anti-Piracy Team sa Criminal Investigation and Detection Group- Anti-Fraud and Commercial Crime Division.
Ang pagronda miresulta sa pagkasakmit sa 80 ka mga computer units nga mokantidad og P2.4 milyones gikan sa Golden Circle, Top One Internet ug Soft Touch Internet ug miresulta sa pagkaaresto sa lima ka tawo.
Ang gipangdakop mao sila si Raymund Soriano, Teodoro Bacalla, Mark Gil Ganate, Jocelyn Rafols ug Jed Rafols nga mga manager ug tag-iya sa maong mga internet café, samtang usa ka Henry Lyndon Leong Kee nga gikatahong tag-iya sa Golden Circle wala diha atol sa pagronda.
Ang pagronda pinasikad sa mga search warrant gikan sa sala ni Executive Judge Reynaldo Tiros sa RTC sa Manila tungod sa paglapas sa Intellectual Property Rights.
Atol sa pagronda gikuyogan kini sa abogado sa Microsoft Philippines nga si Atty. Peter Calimag kinsa mitug-an sa mga tigbalita nga minilyon na ang alkanse sa ilang kompanya tungod sa pagpirata sa ilang mga software ug minilyon usab nga buhis alang unta sa gobiyerno ang nawala tungod usab niini.
Si Sr. Supt. Jorge Corpuz, direktor sa CIDG-7 nagkanayon nga nakadawat sila og reklamo gikan sa mga concerned citizen kabahin sa pag-operate sa maong mga internet café nga walay lisensyadong software.
‘The government means business in anti piracy…we will file cases against the owner and the managers…this programs are produce in enormous cost hindi naman yan lumabas na parang bula,” asoy pang Corpuz.
Ang impormasyon diha gipaagi sa ilang website nga www.papt.org.ph ug ang lokal nga kaabag sa PAPT sa gitumbok nga lokasyon sa maong mga hiwing internet café ug establisamento mao nay moaksyon niini.
Matud pang Chief Insp. Rex Derilo nga usa sa nangulo sa operasyon dili mga miyembro sa Internet Café Association of Cebu ang maong mga establisamento.
Ang ICAC maoy kaabag sa PAPT sa pagsusi nga lisensyado ang tanang mga software sa mga computer nga gigamit diha sa mga internet café apan giklaro ni Derilo nga wala kini mangahulugan nga dili nila rondahon ang mga internet café nga migamit og piratang software.
Ang abogado sa Golden Circle nga si Atty. Kelly Piasidad mikwestyon sa maong pagronda ug naglaraw nga sukit-sukiton ang legalidad sa maong operasyon.
Hinuon wala siya mokomentaryo kabahin sa pasangil nga migamit og gipiratang software ang iyang kliyente sanglit gikinahanglan pa kining pamatud-an sa mga eksperto.