Ceres bus vs trak de karga; 5 angol

Grabeng naangol ang  lima ka mga   tawo sa kalit nga  panagbangga sa   Ceres Bus Liner ug usa ka trak de karga   sa  Sitio Prinsa,  Bogo,  Argao alas 8 pasado ang takna sa miaging gabii.

Si SPO1 Esteban Albuera miingon nga lakip sa naangol mao si Joel Gicali Hempesao,   nga taga lungsod sa Ronda, Ramila Ganilla Gantapa, taga San Fernando, Antonio Navales, Pablo Cablano Sato ug Moises Tapere nga taga Caligngan, Carcar, Cebu.

Matud  pa ni SPO1 Albuera nga gimaneho ni Hempesao ang bus  nga nagdala sa plate number nga GWY 787 ug ang trak  nga gika-engkuwentro ang gimaneho usab ni Gantapa.

Dugang pa niya gikan sa habagatang bahin sa Sugbu ang Ceres Bus Liner ug gikan usab sa bukiran nga bahin ang Isuzu  nga nagkarga og mga utanon.

Sa paghidangat sa eskina nga bahin ang   bus  nga kusog nga nagdagan ang naigo sa trak nga kusog usab nga nagdagan sa dulhogon nga bahin sa maong dalan.

Ang mga biktima kinsa nakabaton og grabeng kadaut sa ilang kalawasan  dali nga gidala   sa Vicente Sotto Memorial Medical Center sa dakbayan sa Sugbu ug padayon kining giatiman sa mga doktor.