Ipahigayon na sa dili madugay ang opisyal nga survey sa boundary sa tulo ka mga barangay sa dakbayan sa Sugbu. Ang City Planning and Development Office miawhag na sa City Engineering Office nga mopahigayon og official geodetic survey sa barangay Carreta, Tejero ug Inayawan.
Giawhag usab ang mga nahisgotang buhatan pag-andam og survey plans ug technical descriptions sa matag barangay.
Matud ni city planning officer Nigel Paul Villarete nga kinahanglang kini mohaum sa format nga gikinahanglan sa Land Management Services kun LMS (kanhi Bureau of Lands).
Nasayran nga nakasumiter na unta sa ilang technical description ang tulo ka barangay ngadto sa konseho sa siyudad apan gikataho nga dunay gamay'ng kalainan ang Geographic Positioning System reading niini itandi sa na-establisar nga geodetic coordinates sa LMS.
Sumala pa ni Villarete nga kini wala hinuoy dakong epekto sa nasabutang utlanan sa nahisgotang mga barangay, apan giingong gikinahanglan nga kini makurehean.
Kini tungod kay kun maaprobahan na ang mga utlanan mahimo na kining official boundary nga mahimong gamiton sa bisan unsang “legal purposes" sa umaabot.
Sumala pa ni Villarete nga ang geodetic survey kinahanglang mosunod sa boundary monuments sa nahisgotang mga barangay.
Malaumon si Villarete nga mahuman sa daling panahon ang geodetic survey aron mahatagan na og kasulbaran ang boundary dispute sa nahisgotang mga barangay.