Mokabat sa 92 ka mga computer machine ang gisakmit sa mga sakop sa National Bureau of Investigation (NBI) Manila nga mironda sa duha ka establisamento sa dalan A.S. Fortuna sa Banilad, dakbayan sa Mandaue.
Ang gironda mao ang Design International Corporation ug Cannon Greek Asia kinsa gidudahan nga nakalapas sa Republic Act 8293 kun Intellectual Property Code sa nasud.
Ang 70 ka mga computer machine nga nasakmit gikan sa Cannon Greek Asia ug 12 usab niini ang nasakmit gikan sa Design International Corporation.
Sa nasayran sa Banat News nga ang maong pagpangronda sa duha ka establisamento walay koordinasyon sa kapolisan sa Presinto 2 sa Casuntingan Police Station.
Si Atty. Jose Yap sa Copyright Division sa NBI miingon nga si Judge Marila dela Cruz sa Branch 2 sa Regional Trial Court Manila miisyu og search warrant nga ilang gigamit sa maong pagpangronda. –RTL