Di pamolitika – Gwen

Si Gobernador Gwendolyn  Garcia mibatig pagmahay sa iyang mga kaatbang sa politika tungod kay ang gitakda niyang pagpanghatag og mga lesson plan ug class records sa mga magtutudlo  giisip mang pamolitika gihapon niya.

Matud pa sa gobernador nga nahuman na ang election  ug dili na panahon karon sa pagpanaad ug pagpasalig  kun dili mao na ang pagtuman sa mga panaad ug pasalig nga iyang gihimo sa wala pay election.

Si Garcia nga napili pag-usab alang sa ikaduha niyang termino sa pagkagobernador sa lalawigan sa Sugbu nangandam nag kuwarta aron ikabayad sa mga suplay sa eskuylahan nga iyang ihatag sa matag estudyante sa elementarya ug sekondarya sa tulonghaang publiko.

Apan gawas sa mga estudyante ilakip usab ni Garcia ang paghatag og class record ug lesson plan sa matag magtutudlo sa eskuylahang iya sa gobiyerno.

Nalantawan sa gobernador nga kun hatagan niyag mga notebook, lapis, ballpen ug bag ang mga estudyante, mas maayong dili usab niya kalimtan ang mga magtutudlo nga maoy silbing ikaduhang ginikanan sa mga estudyante.

Matud pa ni Garcia nakita niya ang sakripisyo sa mga magtutudlo nga luyo sa kadaginoton sa suweldo niini  usahay taplan pa ang mga bayranan sa mga estudyante nga dili makabayad sa amotanan sa eskuylahan.