Fissure

Grupo sa non-government organization nga gitahasan sa kagamhanan sa Talisay nga moprotektar sa mga marine resources ug mobansay sa mga swimmer ug lifeguards sa siyudad ang miduso og kasong kriminal ug administratiba diha sa buhatan sa Ombudsman batok sa prinsipal sa Talisay Central School  sa  Poblacion     Talisay.

Ang Talisay City Swimming and Life Saving Association, Inc. (TCSLSAI) mireklamo og falsification of public documents, dishonesty, grave misconduct, korupsiyon ug malversation of public funds batok ni Maria Lourdes Ipong, prinsipal, Physical Education ug Sports Coordinator sa maong tunghaan.

Ang maong reklamo nadawat sa Deputy Ombudsman for the Visayas Virginia Palanca-Santiago niadtong Mayo 11.

Sila si Padre Tito Soquiño ug Padre Murphy Sarsonas, Rolando Remolino, Ulysis Fernandez, Alfie Fernandez ug Annie Gabasa kinsa mga opisyal sa TCSLSAI ang miduso sa maong reklamo diha sa Ombudsman.

Ang maong grupo mipasangil ni Ipong nga mibulsa sa  kwarta nga para unta ipalit og mga gamit sa mga swimmers nga gipadala sa Central Visayas Regional Athletic Association (CVIRAA) sa milabay'ng tuig nga gipahigayon didto sa dakbayan sa Tagbilaran, Bohol.

Matud pa sa maong grupo nga duna silay dokumentong gihuptan pagmatuod sa ilang mga pasangil ni Ipong.